Jami’an tsaron Nijeriya sun cafke wani mutum mai suna Ifechukwu Dennis bisa zargin ƙirƙirar da kuma yaɗa wani sautin murya da aka ce an samar da shi ta hanyar fasahar basirar wucin gadi (AI), wanda aka gabatar a matsayin muryar Shugaban Ƙasa, Bola Ahmed Tinubu. 
Rahotanni sun nuna cewa an kama wanda ake zargin ne a birnin Benin da ke Jihar Edo, bayan binciken da tawagar musamman ta rundunar ‘yan sanda ta gudanar kan lamarin.
Mai bai wa shugaban ƙasa shawara kan harkokin yaɗa labarai da dabarun sadarwa, Bayo Onanuga, ya tabbatar da kamen, yana mai cewa hukumomin tsaro za su fitar da ƙarin bayanai bayan kammala bincike.
Sautin muryar da ake magana a kai ya bazu sosai a kafafen sada zumunta cikin ‘yan kwanakin nan, inda aka ji abin da ya yi kama da muryar Shugaba Tinubu tana magana kan batutuwan tsaro, siyasa da kuma zaɓen shekarar 2027.
Sai dai Fadar Shugaban Ƙasa ta yi watsi da sahihancin sautin tun bayan fitowarsa, tana mai cewa an ƙirƙire shi ne domin yaudarar jama'a da kuma tayar da ruɗani a tsakanin ‘yan Nijeriya.
Masana harkokin fasaha sun bayyana cewa ci gaban AI ya sa ya zama mai sauƙi a kwaikwayi murya ko hoton mutum cikin inganci mai wahalar ganewa, lamarin da ke ƙara haifar da damuwa kan yaɗuwar bayanan ƙarya da kuma barazana ga tsaron bayanai.
Lamarin ya sake jawo hankalin jama'a kan buƙatar ƙara wayar da kai game da yadda ake tantance sahihancin bayanai a yanar gizo, musamman a lokacin da ake shirin tunkarar zaɓukan siyasa masu muhimmanci.
Hukumomi sun kuma yi kira ga masu amfani da kafafen sada zumunta da su tabbatar da gaskiyar duk wani sauti ko bidiyo kafin su yada shi, domin kauce wa yaɗa bayanan ƙarya da ka iya haddasa rikice-rikice ko ruɗani a cikin al'umma.
0 Comments