Ma’aikatar Albarkatun Ma’adinai ta Jihar Kano ta karɓi shugabannin Hukumar Tattara Haraji ta Jihar Kano (KIRS) ƙarƙashin jagorancin Shugabanta, Alhaji Bashir Yusuf Maitama, domin ƙarfafa haɗin gwiwa da inganta tattara kuɗaɗen shiga daga harkokin albarkatun ma’adinai.
Da yake karɓar tawagar KIRS a ɗakin taro na ma’aikatar, Kwamishinan Albarkatun Ma’adinai, Alhaji Hamza Safiyanu Kachako, ya nuna godiyarsa bisa ziyarar, yana mai cewa an daɗe ana buƙatar ƙara haɗin gwiwa tsakanin hukumomin biyu.
Kwamishinan ya bayyana cewa ma’aikatar ta yi aiki tukuru wajen samar da manufofi da matakan kula da harkar ma’adinai, tare da goyon baya da ƙudurin gwamnatin yanzu ƙarƙashin Gwamna Abba Kabir Yusuf, ciki har da umarnin zartarwa (Executive Order) da ya shafi ayyukan haƙar ma’adinai a jihar.
Alhaji Hamza Safiyanu Kachako ya jaddada cewa samun ingantaccen tsarin tattara kuɗaɗen shiga ba zai yiwu ba sai an samu haɗin gwiwa, fahimtar juna da kuma mutunta ikon da doka ta ba kowace hukuma.
Ya tabbatar wa shugabannin KIRS cewa ma’aikatar za ta tabbatar da gaskiya da rikon amana wajen tattara kuɗaɗen shiga daga ɓangaren ma’adinai.
“Za mu tabbatar da cewa kuɗaɗen da ake samu daga wannan ɓangare suna shiga kai tsaye cikin tsarin KIRS Central Billing System. Ba ma son ganin ko sisi daga cikin kuɗin a gabanmu. Ni ƙwararre ne a harkar gudanar da kuɗi, domin na yi shekara 18 ina aiki a ɓangaren banki kafin na shiga aikin gwamnati,” in ji kwamishinan.
Ya kuma yi kira da a samar da tsarin aiki bayyananne wanda zai taimaka wajen inganta tattara kuɗaɗen shiga daga harkokin albarkatun ma’adinai, wanda ya ce yana daga cikin muhimman hanyoyin samun kuɗaɗen shiga ga jihar.
KIRS ta ce ana asarar kaso mai yawa na kuɗaɗen shiga
Tun da farko, Shugaban KIRS, Alhaji Bashir Yusuf Maitama, ya bayyana cewa ana rasa wani babban kaso na kuɗaɗen shiga sakamakon ayyukan wasu wakilan tattara kuɗaɗen gwamnati, musamman a harkar haƙar yashi da ɗebo yashi daga ruwa (sand dredging).
A cewarsa, binciken da hukumar ta gudanar ya nuna cewa har zuwa kashi 80 cikin 100 na kuɗaɗen shiga da aka tsara samu ana zargin wasu daga cikin wakilan tattara kuɗin suna karkatar da su.
“Wannan ba zai ci gaba ba. Dole ne mu yi aiki tare domin toshe hanyoyin da ake samun asarar kuɗaɗen shiga, tare da tabbatar da cewa kuɗin da ya kamata gwamnati ta samu yana shiga kai tsaye cikin tsarin KIRS Central Billing System,” in ji shugaban KIRS.
Ya bayyana fatan cewa taron zai ba hukumomin biyu damar fayyace ikon da kowannensu yake da shi bisa doka, tare da kafa kyakkyawar alaƙar aiki domin ƙara yawan kuɗaɗen shiga.
An gabatar da shawarar kafa kwamitin haɗin gwiwa
Babban Sakatare na Ma’aikatar Albarkatun Ma’adinai, Alhaji Tijjani Muhammad Sharif, ya ba da shawarar kafa kwamitin haɗin gwiwa wanda zai ƙunshi wakilai daga ma’aikatar da kuma KIRS.
Ya ce kwamitin zai yi aiki tuƙuru wajen samar da tsarin aiki na bai ɗaya da zai daidaita ayyukan hukumomin biyu, tare da gano hanyoyin da za su taimaka wajen inganta tattara kuɗaɗen shiga daga harkar ma’adinai.
A ƙarshen taron, ɓangarorin biyu sun amince da gaggauta kafa kwamitin haɗin gwiwa domin tsara hanyoyin ƙara kusantar aiki, inganta rikon amana da kuma tabbatar da ingantaccen tattara kuɗaɗen shiga daga ayyukan da suka shafi albarkatun ma’adinai a Jihar Kano.
0 Comments